सिलीगुडी । नेपालको पूर्वी नाका नजिकै रहेको पश्चिम बंगालको न्यू जलपाईगुडी छेउमा सोमबार बिहान यात्रुवाहक रेल मालवाहक रेलसँग ठक्कर खाँदा आठ जनाको मृत्यु भएको छ । कोलकातास्थित सिल्दाह जाँदै गरेको कञ्चनजंघा एक्सप्रेस अर्काे मालबाहक रेलसँग ठक्कर खाएको हो ।
घटनामा एकजना लाेकाे पाइलटसहित आठ जनाकाे मृत्यु भएकाे छ । अरु ३० जना घाइतेहरुकाे उपचार भइरहेकाे छ । उद्दार कार्य जारी रहेकाे हुनाले मृतक र घाइतेहरुकाे संख्या बढ्न सक्ने जनाइएकाे छ ।
बिहान अन्दाजी ९ बजे भएको दुर्घटनामा कति यात्रु र चालकदलका सदस्यको मृत्यु भएको छ भन्ने बारेमा हालसम्म पुष्टी हुन सकेको छैन । अहिले भारतीय रेलसेवाका कर्मचारी, सुरक्षा अधिकारी र स्थानीयवासी उदारमा लागेको भारतीय अधिकारीले बताएका छन् ।
घटनास्थल पश्चिम बंगालको न्यु जलपाइगुडी रेल स्टेशनबाट १० किलोमिटरको दुरीमा पर्छ । मालबाहक रेलले पछाडिबाट कञ्चनजंघा एक्सप्रेसलाई ठक्कर दिएको उद्दारमा संलग्न अधिकारीले बताएका छन् । दुर्घटना स्थलमा धेरै मानिस च्यापिएको अवस्थामा रहेको हुनाले अहिले नै घाइते र मृतकको यकिन बिवरण प्राप्त भइसकेको छैन ।
कञ्चनजंघा एक्सप्रेसको डब्बा जमिनको २५ फुट माथि उठेको अवस्थामा देखिएको छ । मालबाहक रेलको एक र यात्रुबाहक रेलको चारवटा डब्बामा पुर्ण रुपमा क्षति पुगेको घटनास्थलमा रहेका भारतीय पत्रकारहरुले जनाएका छन् ।
घटनास्थलबाट हालसम्म दुईवटा शव निकालिएको छ । तर उनीहरुको परिचय भने खुलेको छैन । एउटा शव मालबाहक रेलका चालकको हुनसक्ने अनुमान उनीहरुको छ । आज दिनभरीमा उद्दारकार्य सम्पन्न गरिसक्ने अधिकारीहरुले जनाएका छन् । अहिलेसम्म उद्दार भएका घाइतेहरुको नर्थ बंगाल मेडिकल कलेजमा उपचार भइरहेको छ ।
