काठमाडौं असार १८॥ नेपाली कांग्रेस एमालेबीच नयाँ सत्ता समीकरणका लागि सहमति भएपछि मंगलबार बिहान प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच भेटवार्ता भएको छ।
उक्त भेटवार्तामा ओलीले प्रचण्डलाई सरकारबाट राजीनामा दिएर नयाँ समीकरणका लागि मार्ग प्रशस्त गर्न आग्रह गरेका छन्।
ओलीलाई प्रचण्डको भनाइ उद्धृत गर्दै उनीनिकट स्रोतले भन्यो, ‘प्रचण्डजी तपाईं राष्ट्रिय नायक हो । राजीनामा दिएर मार्ग प्रशस्त गर्नुहोस्, हामी नयाँ सरकार बनाएर देखाउने छौँ।’
ओलीले प्रचण्डलाई नेपाली जनताको आवश्यकता र महत्वका आधारमै नयाँ समीकरण बनेको बताउँदै यसले संविधानका नराम्रा पक्षलाई सुधारेर निर्वाचन प्रणालीलाई सापेक्ष बनाएर लैजाने बताएका थिए ।
जवाफमा प्रचण्डले आफूले संविधानअनुसार ३० दिनभित्रमा विश्वासको मत लिने अडानसहित राजीनामा नदिने बताएका छन् ।
प्रचण्डनिकट स्रोतले भन्यो, ‘प्रधानमन्त्रीज्यूले ३० दिनभित्रमा विश्वासको मत लिनुहुन्छ, राजीनामा दिन्न भनिसक्नुभएको छ, दुई नेताबीच त्यही विषयलाई लिएर छलफल भएको हो।
प्रचण्डले ओलीलाई ‘एक वर्षपछि यहाँ नै प्रधानमन्त्री बनिहाल्नुहुन्थ्यो, किन यति चाँडै सरकार परिवर्तनको खेलमा लाग्नुभयो भनेर प्रश्न पनि गरेका थिए।
जवाफमा ओलीले नेपाली जनताले नै स्थायी र दिगो सरकारका लागि कांग्रेस-एमाले गठबन्धन गरेर संविधानका त्रुटि सच्याउने जनादेश दिएको बताए । उनले निर्वाचन प्रणालीलाई पनि परिवर्तन गर्नुपर्ने भएकाले राष्ट्रको आवश्यकताअनुसार कांग्रेस-एमाले सरकार बनाउन लागिएको जवाफ दिएका थिए ।
