सबै मानिसमा कडा व्यायाम गर्न सामर्थ नहुन सक्छ । कतिपय मानिसले व्यस्तताका कारण पनि व्यायामका लागि पर्याप्त समय छुट्याउन सकिरहेका हुँदैनन् । व्यायाम गर्न नसक्ने वा नभ्याउनेले छोटो समय मर्निङवाक गरेर धेरै स्वास्थ्यलाभ लिन सक्छन् ।
दैनिक कम्तीमा ३० मिनेट मर्निङवाक गर्दा शरीर तथा मस्तिष्क रिफ्रेस रहन्छ । स्फूर्ति बढ्छ । मोटोपन, मुटुरोग, मधुमेह, फ्याटी लिभरजस्ता रोगलाई धेरै हदसम्म नियन्त्रणमा राख्न सकिन्छ ।
कडा व्यायाम गर्न नसक्नेहरूले पनि मर्निङवाक गर्न सक्छन् । अर्थात्, बालबालिकादेखि वृद्धवृद्धासम्म सबै उमेर समूहका लागि यो लाभदायी छ । यसले क्यालोरी घटाएर तौल नियन्त्रणमा भूमिका खेल्छ । यसका मानसिक फाइदा धेरै छन् ।
बिहानीको समयमा मर्निङवाक गर्दा वातावरण स्वच्छ हुन्छ र ताजा हावा लिन पाइन्छ । डिजिटल दुनियाँमा झुम्मिने बानी परेका अहिलेका धेरै मानिसलाई यसले प्रकृतिसँग जोड्ने काम गर्छ । चराचुरुंगीको आवाज सुन्दै बिहानीको शान्त समयमा हरियाली हेर्दै मर्निङवाक गर्दा स्ट्रेस र एन्जाइटी कम हुन्छ । मन शान्त र सिर्जनशील रहन्छ ।
बिहानीको समय
मर्निङवाक बिहानको समयमा गर्नुपर्छ । सूर्योदयभन्दा थोरै पहिले सुरु ग¥यो भने अधिकतम लाभ लिन सकिन्छ । यो समय शान्त र सुन्दर समय हो । स्वच्छ हावा चलिरहेको हुन्छ । अत्यधिक घाम चर्किएपछि मर्निङवाकमा निस्कनु राम्रो मानिँदैन । किनकि, चर्को घामले गर्दा डिहाइड्रेसन हुन सक्छ ।
हल्का कपडा
धेरै बाक्लो लुगा लगाएर हिँड्दा चाँडै पसिना निस्कन्छ र तौल कम हुन्छ भन्ने भ्रम कतिपयमा छ । यो राम्रो होइन । यसले शरीरलाई डिहाइड्रेट गर्छ । तसर्थ, सकेसम्म कटनका कपडा (हावा छिर्ने, हल्का र शरीरलाई शीतलता प्रदान गर्ने) लगाउनु राम्रो हुन्छ । त्यसैगरी, आरामदायी स्पोर्टस् जुत्ता छनोट गर्नुपर्छ ।
एक घण्टाअघि पानी
कतिपयले हिँड्नुभन्दा एकैछिनअघि मात्रै पानी पिउँछन् । तर, पानी पिएलगत्तै हिँड्न थाल्दा पेटमा समस्या देखिन सक्छ । दिसा लाग्लाजस्तो हुने, छिनछिनमा पिसाब आउने समस्या देखिन्छ । तसर्थ, मर्निङवाक गर्नुभन्दा एक घण्टाअघि पानी पिउनु राम्रो हुन्छ ।
नियमित हिँड्नुस्
कतिपय व्यक्ति एकै दिनमा घण्टौँ तथा कैयौँ किलोमिटर हिँड्ने अनि अन्य दिन चुपचाप बस्छन् । कतिपय व्यक्ति एकै दिन छिटो–छिटो हिँड्न खोज्छन् । तर, लामो अवधि हिँड्नुभन्दा महत्वपूर्ण थोरै–थोरै अवधि भए पनि नियमित हिँड्नु हो । दैनिक ३० मिनेट हिँड्दा पनि हुन्छ, तर नियमित हुनुपर्छ । यसले मुटु, फोक्सो, हाड–जोर्नी, मांसपेशी सबैको अभ्यास हुन्छ ।
उकालोमा बिस्तारै हिँड्नुस्
उकालो–ओरालोमा बिस्तारै हिँड्नुपर्छ । यस्ता ठाउँमा छिटो–छिटो हिँड्दा जोइन्टहरू बिग्रने जोखिम रहन्छ । कतिपय मानिस ओरालोमा फटाफट हिँड्ने गर्छन् । यसरी हिँड्दा पछि गएर घुँडाको समस्या आउँछ ।
खानपानमा ध्यान दिने
केही खाएलगत्तै मर्निङवाकमा निस्कनु राम्रो होइन । यदि केही खानुहुन्छ भने आधा घण्टा आराम गरेर मात्रै निस्कनुस् । कतिपयले चिया, कफी खाने गर्छन् । यसले पनि शरीरमा डिहाइड्रेसन गराउँछ । पिसाब बढी लागेर शरीरमा पानीको मात्रा कम भइदियो भने मिर्गाैलामा असर पर्न सक्छ । तसर्थ, मर्निङवाक जानुअघि चिया, कफी पिउनुहुँदैन । मर्निङवाकबाट आएलगत्तै पनि चिया, कफी पिउनु राम्रो मानिँदैन ।
