काठमाडौँ।। बुद्ध एयरले आफ्नो एटीआर ४२ (नाइन एन–एआईएन) विमानको बिदाइ गरेको छ। मंगलबार त्रिभुवन अन्तर्राष्ट्रिय विमानस्थलमाबाट बुद्ध एयरका कर्मचारीले ‘वाटर स्यालुट’ सहित विमानको बिदाइ गरेका हुन्।बुद्ध एयरकाअनुसार उक्त विमानले सन् २००८ सेप्टेम्बर १७ मा माउन्टेन फ्लाइटबाट व्यावसायिक उडान सुरु गरेको थयो। विमानले अन्तिम फ्लाइट पनि माउण्टेन फ्लाइट नै रह्यो।
बुद्ध एयरले १६ वर्षको सेवापछि विमान उडाउन बन्द गरेर ह्यांगरमा राखिने जनाएको छ। यस विमानलाई ७० हजार उडान साइकलपछि बिदाइ गरिएको हो।
नेपालमा मात्र यसले ४० हजार उडान साइकल गरेको छ। ४७ सिट क्षमताको यो विमान १९९७ डिसेम्बर २८ देखि उड्न थालेको थियो।
बुद्ध एयरका प्राविधिक निर्देशक मंगेश थापाले सन् २००८ सेप्टेम्बरमा विमन नेपालमा ल्याएको बताए। उनले सन् १९९५ मा बनेको विमान नेपालमा ल्याउनु भन्दा पहिला १३ वर्ष प्रयोग भइसकेको भए पनि नेपालमा ल्याएर १६ वर्ष सेवामा लगाइएको सुनाए।
उनका अनुसार विमान दुई किसिमले बिदाइ गरिन्छ। पहिलो विमान उत्पादकले दिएको साइकल र विमान सञ्चालकहरुले आर्थिक रुपमा संञ्चालन गर्न नसक्दा बिदाइ हुने गर्छ।
बुद्ध एयरमार्फत नेपाली आकाशमा ४० हजार टेकअफ ल्याण्ड गर्दै १८ लाख यात्रुलाई सेवा दिएको बुद्ध एयरले जनाएको छ।
एक टेकअफ र ल्याण्डिङ बराबर एक उडान साइकल हुन्छ। एटीआर विमान उत्पादक कम्पनीले उत्पादन गरेकोमध्ये पूरा समय ७० हजार उडान साइकलपछि बिदाइ हुने नाइन एन–एआईएन पहिलो विमान भएको बुद्ध एयरले जनाएको छ।
